KALIBO, Aklan — Medyu gin-eangaw ro untat-biyahe nga ginlunsar it Alyansa Kontra Phase-out ng PUV’s at PUJ’s matapos nga owa raya masyadong nabatyagan sa bilog nga probinsiya it Aklan.
Nagapabilin nga normal ro biyahe sa Eastern ag Western side it probinsiya ag owa it naapektuhan nga mga pasahero.
Nasayuran nga nagtingob it pwersa ro Bagong Alyansang Makabayan (BAYAN)-Aklan ag transport organization nga Pinagkaisang Samahan ng Tsuper at Opereytor Nationwide (PISTON-Panay) agud nga mag-ugyon sa ginkasa nga nationwide transport strike makaron nga adlaw, Setyembre 30, agud nga ipakita ro andang pagkontra sa modernization program nga gustong ipatuman it gobyerno, kun sa siin, pagaduea-on ro mga PUJ’s ag PUV’s nga may edad nga 15 anyos pataas.
Sa interview it Bombo radyo, ginpahayag it pilang drivers it pampasaherong jeep nga maskin nga ginakundina man nanda ro plano it gobyerno, apang kinahangean sigon nanda nga pumasada agud nga may makaon ro andang natungdan nga mga pamilya.
