KALIBO, Aklan—Gin-kwestiyon it sektor it transportasyon sa Aklan ro kahauman it lokal nga gobyerno it Aklan para sa ginaduso it Department of Transportation nga jeepney modernization.
Suno kay Edgar Igcazensa, manager it Malinao Lezo Transport Cooperative nga masyadong gin-apura it Land Transportation Franchising Regulatory Board ukon LTFRB ro mga operators sa mga requirements partikular ro pag-file it consolidated petition to modernize antes ro June 30, 2020, apang ko ulihi natukiban nga owa pa ro provincial government nakahimo it Local Public Transport Route Plan ukon LPTRP nga imaw ro baeasihan it LTFRB sa pag-isyu it franchise sa modernong public utility vehicles.
Imbes suno kana nga tig-pitong dag-on kunta ro validity it andang prangkisa hay nahimo makaron nga tig-sang dag-on eon lang bangud nga owa pa sanda naka-bakae it modernize jeep.
Nasayuran nga ro mga jeep nga owa pa na-modernize hay ginapasugtan pa makaron nga makabiyahe basta nga makapasa sa Motor Vehicle Inspection System o MVIS kun sa siin gina-isyuhan anay sanda it provisional authority ukon PA nga valid sa sueod eamang it sang dag-on.
