Kalibo Aklan——–Makabig nga disaster engkaso nga ipatuman it gobyerno ro travel ban sa nasyon nga South Korea.
Raya ro nangin pahayag ni Malay Sangguniang Bayan member Nenette Aguirre-Graf sa ekslusibong pakipag-angot it Bombo Radyo Kalibo.
Ginpahayag dugang nga “bread and butter” it probinsya it Aklan ro turismo rason nga mabahoe nga kalugihan ag kawad-an sa ekonomiya it probinsya engkaso nga pati ro Korean tourist hay maduea eon sa Boracay.
Apang, kon raya ro makapamayad para sa tanan hay kinahang-ean nga magrisgo ro gobyerno.
Ginapanan-aw nga mas mabahoe pa ro magiging epekto engkaso nga makasueod sa nasyon partikular sa Aklan ro coronavirus disease ukon COVID-19.
Sa makaron suno kana hay naga-eabaw gihapon ro mga dumueoong turista nga nagabisita sa isla sa pihak it paeag it COVID-19.
Ginpahayag dugang nga nagtaas ro arrival it mga Europeans kasunod it mga Koreans.
Kapin sa 40 porsyento ro nabawas sa tourist arrival kasunod it pagkaduea it mga Chinese bangud sa nagapadayon nga travel restriction sa mainland China ag sa administrative region kara nga Hong Kong ag Macau.
