National News——-Nagpatuman eun it travel ban ro Pilipinas sa mga biyahero nga maghalin sa Malaysia ag Thailand.
Raya hay kasunod it surge it COVID-19 cases sa mga nasambitang nasyon bangud sa delta variant.
Ginpahayag ni Presidential Spokesman Harry Roque nga gin-aprubahan ni Pangueong Rodrigo Duterte ro rekomendasyon it Inter-Agency Task Force (IATF) nga pagabawaeang makasueod sa nasyon ro mga biyahero nga may unang travel history sa Malaysia ag Thailand sa nagtaliwan nga 14 diyas.
Maga-umpisa ro travel ban it alas 12:01 it agahon sa July 25, 2021 ag magabuhya it hasta 11:59 it tungang gabi-e it July 31, 2021.
Suno kay Sec. Roque, para sa mga pasahero nga una eun sa biyahe , pagapasugtan pa sanda nga magsueod sa nasyon basta siguraduhon eamang na magsunod sa 14 days nga quarantine protocols.
Una eun nga nagpaguwa it travel ban ro Pilipinas sa mga biyahero nga maghalin sa India, Pakistan, Bangladesh, Sri Lanka, Nepal, United Arab Emirates, ag Oman.
Sa pinakaulihing datos it Department of Health (DOH), kapin sa 47 nga Delta variant eun ro nailista sa nasyon.
