KALIBO, Aklan—Kasunod it pagpatuman it general community quarantine ukon GCQ sa Aklan, ginpahayag ni P/Lt. Col. Belzhassar Villanoche, hepe it Kalibo municipal police station nga ro mga may travel pass eamang nga pirmado it natungdan nga alkalde it kada banwa ukon authorized representative ro pagakilaeahon it Kalibo border management teams.
Raya hay matapos ginkasugtanann sa pueong it Provincial Inter-Agency Task Force (PIATF) nga 50 nga ka non-essential travelers eamang kada banwa ro pagapasugtan nga makasueod sa banwa it Kalibo.
Apang exempted sigon ro mga nagakinahang-ean it medical services ag importanteng panaw.
Sa pihak nga parte, ginpahayag ni Villanoche nga ginduea eon ro liquor ban apang bawae nga makipag-inuman sa mga pampublikong lugar.
Todo bantay man sigon ro mga otoridad sa pagpatuman it curfew nga 8:00pm to 4:00am kamana man it safety and health protocols eabi eon ro pagsuksok it face mask, face shield ag physical distancing agud nga makalikaw sa deadly virus.
Sa pihak nga parte, ginkumpirma ni P/Lt. Col. Villanoche nga haeos 100 porsiyento eon nga fully-vaccinated ro mga miyembro it Kalibo PNP.
Gintaw-an sigon sanda it prayoridad matapos nga makabig nga mga frontliners.
