KALIBO, Aklan — Big winner ro Vikings it Barangay Dumga, Makato, Aklan sa mga nagpasakop sa Tribal Big Group Category sa street dancing competition sa katatapos nga Kalibo Sto. Niño Ati-Atihan Festival.
Nagbaton ro Vikings it P275,000 nga cash prize matapos pyerdihon ro defending champion nga Black Beauty Boys it Brgy. Linabuan Norte, Kalibo.
Mag-eowas kara, naangkon man nanda ro special awards nga Best in Street Dancing ag Best in Costume nga may cash prize nga tig-P5,500.
Ro Tribung Black Beauty Boys hay nagdaog it P165,000 bilang second prize winner ag Best in Beat and Sound, samtang nagpangatlo ro Libtong Boys it Sitio Libtong, Estancia, Kalibo nga nagbaton it P132,000.
Samtang, ro iba pang nagdaog sa Sadsad Ati-atihan Contest hay ro Kabog Tribe it Estancia, Kalibo bilang first prize nga nag-uli it P121,000 kamana man Best in Beat and Sound ag Best in Street Dancing; nagpangaywa ro Tribu Bukid Tigayon it Tigayon, Kalibo nga may cash prize nga P88,000 ag una sa ikatlong pwesto ro Tribu Niñolitos it Tigayon, Kalibo nga nakabueo man it Best in Costume para sa Tribal Small Category.
Para sa kategoryang Balik-Ati/Original Group, daog ro Sinikway nga Ati it Calangcang, Makato nga nagbaton it P110,000. Sanda man ro nakabueo it Best in Street Dancing ag Best in Costume, samtang Best in Beat and Sound ro Tribu Datu Puti.
Second place ro Tribu Naisud it Brgy. Naisud, Ibajay nga may cash prize nga P66,000; ag third place ro Apo ni Inday it Calangcang, Makato nga nag-uli it P49,500.
Para sa modern Group Category, first prize winner ro Aeang Aeang it Brgy. Laguinbanua West, Numancia nga nagbaton it P110,000.
Ginhakot man nanda ro special awards nga Best in Beat and Sound, Best in Street Dancing ag Best in Costume.
Nagpangaywa ro Atras Abante it Sitio Datu, Poblacion, Makato nga nag-uli it P66,000; ag nagpangatlo ro Roadside it Brgy. Linabuan Sur, Banga nga may premyong P38,500.
Ro Kalibo Sto. Niño Ati-atihan Festival makaron nga dag-on hay nag-umpisa ko Enero 10 hasta it 19, kon sa siin, highlight it selebrasyon ro street dancing ukon sadsad contest ko adlaw it Sabado nga ginpasakupan it 32 tribu ag grupo kamana man ro Pilgrim’s Mass sa prente it St. John the Baptist Cathedral nga ginsundan it bilog nga adlaw it streetdancing it mga tribu ag bisita.
Maskin bumuhos ro uean, maabo ro nagsunod sa religious procession ag torch street dancing sa hapon.
