Kalibo Aklan ——–Magapangatubang sa kasong pag-eabag sa Republic Act 9165 ukon Comprehensive Dangerous Drugs Act ro sangka tricycle driver matapos nga maaresto sa ginpatigayon nga buy-bust operation bandang alas-9:30 kaina it agahon sa Rizal St. Barangay Poblacion, New Washington.
Suno kay Aklan Police Drug Enforcement Unit ukon PDEU Chief Police Major Frensy Andrade nga kilaeang nagaduso it ilegal nga droga ro suspek nga si Angelo Dalida, 37-anyos ag residente it Brgy. Cawayan, New Washington rason nga mabuhay eon nanda raya nga gina-surveillance .
Nabakae sa suspek it poseur buyer ro sangka sachet it ginadudahan nga shabu kabaylo it 1,500 pesos nga buy-bust money.
Apang sa pag-body search kana hay narekober ro sambilog pang sachet nga anang ginhana nga ipilak ag iba pang kwarta sa nagkaeain-eain nga denomination.
Naging pwersahan sigon ro pag-aresto kay dalida matapos nga magpamalibad raya nga magpabutang it posas .
Si Dalida hay temporaryong nakakulong sa lock-up cell it New Washington PNP ag nakataeanang igabiyahe sa Iloilo City agud nga ipaidaeum sa drug test kamana man ro mga nabo-oe nga droga hay iga-subject sa pag-usisa sa Regional Crime Laboratory .
Madumduman nga ro suspek hay kaibahan man sa target sa ginkasa nga operasyon sa banwa it balete antes ro lockdown, apang owa raya nakasunod sa daywang kaibahan nga naaresto it mga kapulisan .
Gindugang pa ni Major Andrade nga ginabo-oe kara ro ginabaligya nga droga sa probinsiya it Capiz ag ginabaligya sa anang mga parokyano sa banwa it New Washington ag Kalibo.
Posibleng hin-aga ukon sa lunes raya matigayon nga makasuhan .
Sa pihak nga parte, hugut nga ginpamalibaran ni Dalida nga eakot imaw sa pagduso it iligal nga droga.
