KALIBO, Aklan — Nag-atubang eon sa Kalibo Police Station ro tricycle driver nga gina-alegar nga nagdaea sa sangka 19 anyos nga estudyante sa sangka lugar nga maeayo eon sa anang destinasyon.
Raya hay matapos nga matumod ro driver nga si Luis David Salgado, tumandok it probinsiya it Antique, apang presenteng naga-istar sa banwa it Kalibo pinaagi sa nabo-oe nga body number it tricycle nga may biyaheng New Buswang .
Suno kay P/Corporal Chris Paul Alejandro, imbestigador sa kaso it Kalibo PNP nga naalarma sigon ro babaye matapos nga magsakay halin sa Aklan Catholic College sa Archbishop Reyes St. ag magapanaog kunta sa ACC sa Roxas Avenue Extension, apang ginlibot pa raya sa kon siin siin hasta nga naka-abot sa Magdalena Village sa Brgy. New Buswang, Kalibo maeapit sa warehouse it sangka bottling company .
May nakasakay sigon imaw ko una, apang nagpanaog sa PhilHealth Office sa D. Maagma St.
Mag-eowas nga owa it katawo-tawo sa nasambit nga lugar hay naghambae pa sigon ro driver nga malibot-libot anay sanda .
Bangud sa koeba hay napilitan imaw nga mag-eumpat sa tricycle ag sa mayad nga swerte hay owa naninahan.
Detalyado man nga ginsaysay it estudyante ro gindaehan kana pinaagi sa anang ginhimo nga sketch.
Nasayuran nga ro estudyante hay residente it Brgy. Carugdog, Lezo.
Samtang, kadungan sa pagpangayo it pasaylo ni Salgado sa estudyante, ginhambae kara nga owa imaw it anuman nga maeain nga intensyon sa babaye ag nagpang-eakman eamang imaw nga maka-usoy pa it ibang pasahero rason nga naagto sanda sa nasambit nga lugar.
Matapos ro komprontasyon hay gin-refer ro kaso sa taeatapan it Traffic and Transportation Management Division it LGU-Kalibo para sa nagakaigo nga disposisyon.
