KALIBO, Aklan—Nagpa-blotter man sa Kalibo Police Station ro tricycle driver nga nauna eon nga ginreklamo it anang pasahero it overcharging.
Aminado ro driver nga si Myron Reportado nga nagpangayo imaw it dugang nga napueong piso sa beinte pesos nga ginbayad kana it pasahero , apang kat magreklamo hay owa eon nana raya ginpilit pa.
Nasayuran nga ro pasahero hay nagsakay sa parte it Brgy. Tigayon ag nagpahatud sa Aklan Provincial Hospital.
Gindugang pa kara nga owa pa imaw it ginabuytan nga fare matrix ukon taripa sa bag-ong panueuktan.
Haum man sigon imaw nga makipag-atubang sa tagreklamo engkaso nga patawgon sanda sa Sangguniang Bayan it Kalibo.
Samtang, matsa nakakita man it kaapin si Reportado matapos nga ginpaathag ni Federation of Kalibo Tricycle Operators and Drivers Association, Inc. ukon FOKTODAI President Johnny Damian ro ginatawag nga over-charging.
Apang ginpamilit kara nga may kinamatarung nga mag demand it pamasahe ro driver sa anang pasahero kon may ginabuytan raya nga taripa.
