KALIBO, Aklan—Ginpaidaeum eon sa inquest proceedings para sa kasong pag-eabag sa Republic Act 10591 ukon Comprehensive Firearms and Ammunitions Law si Johnrey Rey Laurente, 44 anyos, sangka tricycle driver ag residente it Brgy. Laguinbanua West, Numancia.
Si Laurente hay nauna eon nga nadakpan sa ginpatigayon nga raid agahon it Lunes sa andang baeay sa gahum it search warrant nga ginpaguwa ni Hon. Judge Bienvinido P. Barrios, Jr. bangud sa gina-alegar nga paghupot it mga baril.
Narekober sa sueod it anang baeay partikular sa idaeum it katre ro sangka .38 caliver revolver, 4 nga mga bala kara, 6 nga bala it .45 caliber, 3 nga empty shell it caliver 45, sangka unit it .22 caliber rifle ag sangka scope.
Sa pihak nga parte, sa interview it Bombo Radyo, ginpahayag ni PMaj. Fidel Gentallan, hepe it Numancia Municipal Police Station nga ro sin-o man nga maaresto nga suspek hay may kinamatarung nga magpamalibad.
Raya hay kasunod it panindugan ni Laurente nga puro planted ro narekober nga armas kana rason nga nagpamalibad nga magpirma sa inventory sheet.
Apang ginpahyag ni Gentallan nga dati eon nga may record it pagpanutok it baril ro suspek sa andang lugar.
Nauna eon nga ginpahayag it suspek nga may away sa eugta sanda nga magparyente sa nasambit nga lugar.
Kadungan kara, gin engganyo ni Gentallan ro mga indibidwal nga padayun nga nagahupot it armas nga owa it nagakaigo nga dokumento nga isurender agud nga malikawan nga makasuhan.
