Kalibo Aklan —– Arestado ro sangka eaeaki matapos maaktuhan it mga otoridad samtang nagalibot-libot sa banwa it Kalibo sakay sa anang ginamanehong tricycle sa pihak it ginapatuman nga curfew hours.
Ginkilaea ro suspek nga si Emmanuel John Lopez, 29-anyos ag residente it Brgy. Camansi Norte, Numancia.
Si Lopez hay gin-aresto it Kalibo PNP matapos nga magbayolar sa ginpagguwa nga Executive Order No.20 Series of 2020 kasunod it ginapatuman nga Enhanced Community Quarantine sa bilog nga probinsya it Aklan.
Base sa report, samtang nagapatigayun it pagpatrolya ro mga katapo it Kalibo PNP sa may porsyon it Jaime Cardinal Sin Avenue bandang 9:30 kabi-i hay andang naaktuhan si Lopez nga padayun sa paglinibot sakay it tricycle.
Bangud kara hay ginpaeapitan imaw it mga otoridad ag ginkutana kung ham-an nagapabilin pa raya sa guwa kung sa siin indi man kara ma-justify ro anang tuyo sa pagguwa.
Samtang sa pihak nga parte, arestado man ro daywang ka mga indibidwal sa porsyon it Roxas Avenue, Brgy. Poblacion, Kalibo.
Nadakpan it pulisya nga nagawarang gihapon sa guwa sanday Celso Amante ,35-anyos ag residente it Brgy. Tigayon Kalibo kaibahan si Anthony Villante, 36-anyos ag residente it Purok 2 C. Laserna Street, Brgy. Poblacion, Kalibo.
Ro mga nasambit nga persona hay temporaryong nakakulong sa locked-up cell it Kalibo Police Station.
