KALIBO, Aklan – Natimbog it mga kapulisan ro sangka eaeaki nga nagaduso it droga sa natabo nga buy bust operation kahapon, Hunyo 3 sa Brgy. Ugsod, Banga.
Suno kay P/Capt. Benny Jones Mendoza hepe it Banga Municipal Police Station nga nag’umpisa nga ginmonitor ro suspek ku Disyembre it nagtaliwan nga dag’on bangud sa kasong physical injury apang naareglo ag pinatawad man it anang live-in partner.
Ginkilaea ro 40-anyos nga suspek nga si Roel nga taga’Ugsod, Banga ag sangka tricycle driver.
Ginbak’ean sigon ro eaeaki it gina’alegar nga shabu it mga intel.
Hakumpiskahan it tatlong sachets it ginapatihan nga shabu ro suspek ag P1,500 nga buy bust money.
Inisyatibo ro nasambitan nga operasyon it joint forces it Provincial Drug Enforcement Unit ukon PDEU ag Banga PNP.
Samtang, padayon pa ro ginahimo nga imbestigasyon it Banga PNP kun siin nagahalin ro anang supply.
