KALIBO, Aklan—Ginkumpirma it Aklan Police Provincial Office (APPO) nga may natabao nga bakbakan sa tunga it tropa it gobyerno ag New People’s Army ko nagtaliwan nga adlaw sa Sitio Nulwan, Brgy. Siya, Tapaz, Capiz.
Suno kay Police Lieutenant Colonel Bernard Ufano it APPO nga nakasagupa it 12 Infantry Battalion it Philippine Army ro grupo it NPA sa nasambit nga lugar.
Ro insidente hay nag-aywan it daywang ninahan nga soldado.
Gindugang pa ni Ufano nga nasapwan sa gin-eontaran it bakbakan ro pilang kagamitan nga ginakaeakipan it subversive documents ag cellphone.
Agud masiguro nga mapabilin ro katawhayan sa lugar ag mapaeayoyo sa paeag it terorismo, sigidas man ro ginahimo nga minor ag major operation it APPO pinaagi sa 1st Aklan Police Mobile Force Company.
Tuyo sigon it operasyon nga magtao it seguridad ag maduea ro presensya it rebeldeng grupo eabi eon sa bahin it Brgy. Manika ag Dalagsaan sa banwa it Libacao.
Nasayuran nga nagapabilin nga insurgency free ro bilog nga probinsya it Aklan halin ko dag-on 2011.
