KALIBO, Aklan — Uman nga gintaw-an it atensyon ro pagpatuman it Truck Ban Ordinance sa banwa it Kalibo.
Suno kay Sangguniang Bayan member Ronald Marte nga raya hay matapos mataeupangdan nga owa eon ginasunod it pilang truck drivers ro gintaeana nga oras it pagbawae.
Bangud kara, sangka resolusyon ro anang gindihon sa pagtaeana it mga Truck ban signages sa mga municipal roads.
Ginpahayag dugang nga sa masunod nga domingo hay magapatawag imaw it committee meeting kaibahan ro Traffic and Transport Management Division (TTMD) it LGU-Kalibo, Kalibo Municipal Police Station nga in-charge sa traffic division ag office of the mayor agud nga matalakay ro mga dapat nga obrahon sa implementasyon it batas trapiko.
Agud nga maging epektibo suno kana ro ordinansa, kinahangean kara ro hugut nga implementasyon, monitoring, ag penalidad sa mga maga-eabag.
Sa idaeum it naga-eksister nga municipal ordinance angot sa truck ban, may gintaeana nga oras nga nagabawae kanda nga magsueod ag mag-park sa mga nagapangunang karsadahon agud nga malikawan ro paggutok it trapiko.
Apang ro nasambit nga mandu hay owa ginasunod bangud sa kawad-an it mga signages .
Kaeabanan sigon nga naga agi ro mga truck ag kon amat hay naga parking pa sa mga oras nga bawae.
Igasuhestiyon sigon nana sa pueong nga mas pa nga pabaskugon it mga awtoridad, kapareho it mga enforcer sa mga critical nga oras ro truck ban, eabi eon sa mga lugar nga maeapit sa eskwelahan agud nga masiguro ro kaeowasan it mga estudyante ag pedestrian.
