KALIBO, Aklan—Pag-eabag sa Republic Act 10591 ukon Illegal Possession of Firearms and Ammunition ro nakataeanang kaso nga pagaatubangon it sangka truck driver matapos nga madakpan it illegal nga armas sa Brgy. Tabangka, Numancia.
Ginkilaea ro suspek nga si Ramon Victoriano, 40-anyos ag residente it Brgy. Sugnod, Malinao.
Narekober sa kilid it suspek ro sangka .38 nga revolver nga loaded it an-om ka bala.
Una kara, samtang may ginapatigayon nga drug buybust operation sa nasambit nga lugar, nataeopangdan ro nasambit nga truck nga puno it karga nga kahoy rason nga ginsita it mga otoridad ag ginpangayuan it mga nagakaigong dukomento ro driver kaibahan ro 18 ka mga pahinante.
Angot kara, gin-usisa it pulisya ro driver seat ag tumambad kanda ro nasambit nga kalibre it baril nga uwa it ginapakita nga dokumento apang ro karga kara nga kahoy hay may nagakaigong dokumento ag legal ro pagtransport kara.
Bangud kara, ginbitbit it mga otoridad si Victoriano sa taeatapan it pulisya kon sa siin imaw sa makaron nakakulong para sa anang nagakaigong disposisyon.
Samtang, ro mga kaibahan kara nga pahinante hay insigida man nga ginrelease.
