Gin-engganyo ni U.S. President Donald Trump ro Iran nga magsurender eon lang agud nga matapos eon ro nagapadayun nga giyera sa tunga it daywang nasyon.
Sa sangka phone interview, ginpahayag ni Trump nga dapat sigon nga magpasaka it “white flag of surrender” ro Iran samtang nagapabilin nga owa nagasueong ro mga pag-istorya para sa pagtapos it away.
Ko Hunyo, nagkasugot ro Washington ag Tehran sa sangka memorandum of understanding nga nagtaeana it insigida ag permanenteng pagpundo it mga operasyong militar sa magtimbang nga parte.
Sa pihak kara, owa raya nagbuhay ag ginhambae ni Trump nga nag-expire eon ro kasugtanan ko Hulyo 7, samtang ginkumpirma man it Iranian Foreign Ministry makataliwan ro sang domingo nga andang ginkansela ro kasugtanan.
Sa idaeum it nasambit nga kasugtanan, dapat kunta nga makikipagnegosasyon ro daywang nasyon sa sueod it 60-diyas para sa sangka mas maeapad nga kasugtanan kaibahan ro isyu sa nuclear program it Iran.
Sa naging separado nga pag-istorya it Oman ag Iran, gintalakay kara ro uman nga pagbukas it commercial shipping sa Strait of Hormuz.
Nagpaandam man si Trump kontra sa Oman engkaso nga baeabagan sigon kara ro mga tikang it US sa rehiyon hay sigurado nga bomba ro andang igapadaea.
Dugang pa kara nga owa it kahilabtanan ro nagahilapit nga November midterm elections sa anang mga ginahimo nga tikang angot sa Iran.
Ginpamilit it pangueo nga ro nagapangunang tuyo it anang administrasyon nga pugngan ro Iran nga makaangkon it nuclear weapon.
