KALIBO, Aklan—Imposible nga indi mag-concede si incumbent US president Donald Trump sa nagpanguna sa bag-o eamang natapos nga eleksyon nga si democrat Joe Biden.
Raya ro pagpati ni Sangguniang Panlalawigan member Atty. Harry Sucgang.
Suno kana nga bangud nga ginatan-aw nga modelo it bilog nga kalibutan ro Amerika hay indi pwedeng magpamalibad si Trump nga makaangkon it malinong nga transfer of power.
Makabig sigon nga kauna-unahan sa kasaysayan it US engkaso nga indi mag concede si Trump maskin nga naresolba eon ro tanan nga mga legal challenges.
Obligado sigon ro sin-o man nga kandidato sa pagka-pangueo nga magbaton it kapierdihan ag magpa-ubos matapos nga mahuyap ro tanan nga mga boto ag natapos eon ro mga kaso sa korte.
Owa man imaw nagapati nga gindaya si Trump bangud nga masyadong instrikto ro mga election officers ag maabu ro mga nagasaksi halin sa gobyerno ag magtimbang nga partido.
Gindugang pa ni Atty. Sucgang nga naging tradisyon eon it eleksyon sa amerika ro concession ukon matawhay nga pagsaylo it gahum sa anang hugut nga karibal bilang pagrespeto sa proseso.
Mag-eowas sa electoral college hay daog man si Biden sa popular votes.
