KALIBO, Aklan—Sa pihak it masandukot nga bakbakan, matsa imposible eon nga maka-eagas si republican Donald Trump sa nagapanguna makaron nga si democrat Joe Biden sa makasaysayan nga US General Election.
Suno kay Bombo International Correspondent Dr. Gabriel Ortigoza, sangka manugturo sa California nga umabanse eon it eubusan si Biden sa mga ginakabig nga swing states nga Georgia, Pennsylvania, Nevada ag Arizona.
Plano suno kana ni Trump nga daehon ro protesta sa US Supreme Court, apang nagaduha-duha pa bangud sa kawad-an it mabakod nga ebidensiya.
Owa sigon it baeasihan ro pahayag ni Trump nga gusto it democrats nga takawon ro eleksyon kasunod it garapalan nga dayaan.
Bangud sigon sa nasambit nga pahayag hay nag-rally ro anang mga tagasuporta, apang owa nagakasinanto ro andang ginapaninggitan.
Sa Pennsylvania kun sa siin tagilid eon si trump hay gusto it anang mga tagasuporta nga papunduhon ro paghuyap it boto, apang sa Arizona nga naga-eagas ro republican hay ginaduso nanda nga huyapon ro tanan nga boto.
Ginpaathag pa ni Dr. Ortigoza nga makaaangkon it automatic recount kon ro deperensiya hay point 5% sa kabilugan nga boto.
Gindugang pa ni Dr. Ortigoza engkaso nga magadaog si Biden, pagatutukan nana ro bag-ong nationwide plan agud nga suk-ean ro krisis sa Coronavirus, kun sa siin masobra sa 220,000 nga kabuhi ro namatay ag minilyon ro na-infect.
Mag-eowas kara, posibleng paga-ayuson man nana ro kahalitan nga gintuga sa bagsak nanda nga ekonomiya, pagbalik sa paris accord sa isyu it climate change, uman nga pagbukas sa immigration ag ro pagbalik sa manami nga foreign relations sa nagkaeain-eain nga nasyon nga kaalyado it US.
Mabahoe man suno kana ro posibilidad nga uman kara nga buksan ro border it US , igapabilin ro affordable healthcare ukon mas kilaea sa tawag nga Obamacare ag libreng tuition sa mga community colleges.
Samtang, engkaso nga magadaog si Biden ,bitbit kara ro anang bise presidemnte nga si kamala harris nga magiging kauna-unahan nga babayeng US vice president.
