KALIBO, Aklan—Maskin nga pormal eon nga gindeklara it US Electoral College ro kadaeag-an ni US President-elect Joe Biden sa nagtaliwan nga presidential elections sa Amerika, apang pursigido sa gihapon si Incumbent President Donald Trump nga kwestiyunon ro resulta it eleksyon.
Suno kay Bombo International Correspondent Cha Reyes , tubong Banga ag presenteng naga-istar sa Virginia, USA nga palaisipan pa kanda kon ano ro matabu sa Enero 6, 2021 , kun sa siin base sa proseso, magapatigayon kara it joint session ro Congress para opisyal nga paghuyap it boto ag sertipikahan ro pagdaog ni Biden.
Apang ro magapungko pa sigon nga presiding officer sa raya nga tiempo hay ro bise presidente ni Trump nga si Mike Pence rason nga pagahueaton kon raya hay masertipikahan.
Mag-eowas kara, maabu nga mga Republicans sa kongreso ro nagapamalibad nga kilaeahon ro pagdaog ni Biden.
Nauna eon nga nagpaandam si Trump nga paga-aywan eamang nana ro opisina kon masertipikahan ro pagdaog ni Biden.
Nagdaog si Biden sa Electoral College matapos makabo-oe it 302 votes kumpara sa 232 ni Trump.
Nagtililipon kaina sa sesyon ro Electors para magboto ag pabakuron ro pagdaog ni Biden sa 2020 presidential elections.
Ginpabakod man ro pagdaog ni Kamala Harris bilang bise presidente.
Madumduman nga ro tanan nga boto halin sa battleground states it Michigan, Wisconsin, Pennsylvania, Arizona ag Georgia hay pumabor tanan kay Biden rason nga gina-kwestiyon raya ni Trump hasta sa makaron.
Ro pagtililipon sigon makaron nga adlaw it Electoral College hay makabig nga formality eon lang , apang bangud sa padayun nga pag-kwestyon sa pagdaog ni Biden , indi pa masayuran ro magiging scenario sa ulihi.
Apang kumbinsigo si Reyes nga indi eon magabag-o ro resulta it eleksyon.
