BALITANG Espesyal — Bangud sa init it tiempo, nag-order ro doktor nga si Orlem Brandon Serrao halin sa Mumbai, India it tatlong ice cream cones pinaagi sa sangka online grocery delivery app.
Samtang ginakaon ro butterscotch-flavored ice cream, gulpi imaw nga naka-angkit it sangka matig-a nga bagay.
Gin-eaum nana ko una nga mani ukon tsokolate raya; apang matapos nga i-eu-ad, dikara nana nakita ro sangka putoe nga tudlo it tawo!
Kat usisaon ro gin-eu-ad nga sahog it ice cream, nataeupangdan ni Serrao ro kuko ag fingerprints kara. Bangud nga sangka doktor, pamilyar imaw sa mga parte it eawas ag nakumpirma nana nga raya hay sangka kumaeagku.
Insigida nana raya nga ginpahisayod sa mga pulis.
Suno sa manufacturer nga Yummo Ice Cream, ginpundo eon nanda ro produksyon it nasambit nga produkto. Ginpasiguro man nanda nga magabulig sa imbestigasyon angot sa insidente.
Angot kara, sangka owa ginpangaeanan nga empleyado it Yummo ro ginkasuhan it food adulteration and endangering human life.
Sa makaron, ginpadaea eon sa sangka forensic lab ro putoe nga tudlo agud nga matumod kun raya hay ginapanag-iyahan baea it sangka tawo ukon sapat.
