Ginsuhestiyon ni Senator-Judge Raffy Tulfo nga ikumpara ro mga dokumentong ginabuytan it Senate Impeachment Court ag ro mga ebidensiyang ginsumite it defense team angot sa propiyedad ni Atty. Manases “Mans” Carpio sa Matina Crossing, Davao City.
Raya hay kasunod it pahayag it testigo nga si Davao City Assessor Engr. Jaime Adalin nga nakapangaean kay Carpio ro nasambit nga propiyedad.
Suno kay Tulfo, dapat nga ikumpara ro titulo it eugtang gindeklara ni Vice President Sara Duterte sa anang Statement of Assets, Liabilities and Net Worth (SALN) sa titulong ginatalakay makaron sa impeachment trial.
“What if i-subpoena natin ’yung title na ’yun and then ’yung title na pinag-uusapan natin ngayon… Pagbanggain na lang natin?” suhestiyon ni Tulfo.
Samtang, ginpahayag ni Presiding Officer Chiz Escudero nga una eon sa ebidensiya it korte ro nasambit nga titulo ag ginakilaea raya it daywang partido.
Ginpamilit ni Tulfo, kun nagakasinanto ro daywang dokumento, pwede eon nga matapos ro isyu. Apang kon magkaiba ro mga raya, dapat nga padayunon ro pag-usisa bangud nga posibleng makaangkon it isyu angot sa saea nga deklarasyon it propiyedad sa SALN.
