KALIBO, Aklan—Viral makaron ro tumaeagsahon nga wedding proposal it sangka bumbero sa banwa it kalibo nga medyu ginhadlok anay ro anang nobya antes nana raya nga pakiligon sa agaw-eksena nga proposal.
Ro post sa social media angot sa nasambit nga wedding proposal hay humakot eon makaron it masobra sa 140,000 nga likes , kapin sa 12,000 comments ag 67,000 nga shares.
Sa interview it Bombo Radyo, ginpahayag it bride-to-be nga si Jonah Eliza Prado, sangka manugturo sa aklan state university nga owa imaw it kasayuran sa naging plano it anang nobyong si fire officer Jun Rey Tordecillas, kun sa siin naging kakunchaba kara ro anang mga katrabaho sa kalibo fire station ag iba pa nanda nga mga kakilaea.
Nag-agto sigon imaw sa taeatapan it Bureau of Fire Protection ukon BFP-kalibo matapos nga hinyu-on ni fire senior inspector joseph cadag, Municipal Fire Marshal bangud nga may gusto raya nga pangutan-on kana.
Pag-abot sa opisina ni fire senior inspector cadag hay gulpi sigon nga nagtunog ro fire alarm ag nag-anunsyo nga may sunog rason nga naging masako ro tanan nga mga bumbero.
Kat masayuran sigon nana nga wedding proposal ro natabu ag nag-euhod sa anang prente ro nobyo, nakahambae eagi imaw it “Yes” maskin nga owa pa raya nagpangutana kana ag owa it gindawat nga engagement ring.
Eubus sigon imaw nga nakibot ag indi masayuran ro obrahon sa sobrang kalipay nga nabatyagan.
Natabu ro kakaibang wedding proposal ko lunes nga adlaw, Oktubre 12, kun sa siin blangko imaw sa mga plano ni Jun Rey.
May eksena suno kana nga nagguwa ro fire truck, apang nangawa imaw nga gulpi man raya nga nagbalik.
Raya hay bangud nga sa kilid gali it fire truck nakabutang ro props it nobyo nga nagahambae nga “Will you marry me.”
Mag-eowas kara, ro fire alarm hay nabayluhan sigon it andang “theme song” nga Forevermore it Side A.
Ginpahayag dugang ni Jonah nga indi pa raya makapati nga naga-propose eon kana ro anang nobyo bangud nga matsa bukon it seryoso ro itsura ni jun rey nga nagahinibayag ag nagatumbo-tumbo.
Indi sigon nana eubusan nga maisip kon paalin nga ginpahauman ni Jun Rey ro tanan ag kon paalin nga gintipon ro anang mga suod nga amiga ag mga dating estudyante kamana man kon paalin nga nakumbinsi ro bilog nga BFP-kalibo sa anang plano.
Nagapasaeamat sigon sanda nga daywa bangud sa pihak it mga inagihan nga pagsubok sa sueod it 12 anyos nga magkarelasyon hay naging mabakod ro andang pagmaeahaean.
Dati sigon nga seaman ro anang nobyo, apang gintalikdan ro mabahoe nga sweldo ag mas ginpili nga mag-usoy it ibang trabaho sa patag agud nga makaibahan ro anang magiging pamilya sa tanan nga oras.
Madumduman nga ro daywa hay nagkakilaea ko September 17, 2008 sa Aklan Training Center para sa sangka Essay Contest nga gin-organisa ni Jun Rey bilang sangka SK Federation President it probinsiya it Aklan ko rato nga paniempo.
Sa pihak it krisis sa COVID-19 pandemic, nagapangibabaw sa gihapon ro pagmaeahaean nga nagpakilig sa maabu nga mga pumueuyu.
Sa makaron hay ginaplanuhan eon man nanda ro petsa it andang kasae.
