Kalibo Aklan ——–Ginlunsar ni Nabas Mayor James Solanoy ro “tupad mo, bantay mo” kontra COVID-19.
Suno kana nga tuyo kara nga mabantayan it husto ro mga ginmanduan nga magpaidaeum sa isolation nga bilog nga pamilya ukon compound it anda mismo nga mga kaeapitbaeay.
Engkaso suno kana nga may sangka miyembro it pamilya nga makabig nga close contact it sangka COVID 19 positive hay insigida nanda nga igamandu ro lockdown it baeay ukon compound .
Kadungan kara, nag apela ro alkalde it pag-intindi ag kooperasyon sa publiko agud nga matapna eon ro pagkalhit it deadly virus, kun sa siin sigidas ag madasig ro pagtapon it sakit .
Sa oras suno kana nga magguwa ro resulta it swab test ag mag-negatibo sa virus, pagkataliwan it tatlo hasta ap-at nga adlaw nga isolation hay pwede eon sanda nga makaguwa sa andang natungdan nga mga baeay .
Ginpasiguro man nana nga pagataw-an it nagakaigo nga food packs ro mga apektadong pamilya.
Samtang, sa ginpatigayon nga pagtuon, natukiban suno kana nga ro mass gatherings ag local transmission ro kaeabanan nga ginatumod nga superspreader it virus.
Angot kara, ginpahayag pa ni Mayor Solanoy nga bastante pa man ro andang mga quarantine facility para sa mga nagpositibo nanda nga mga residente.
Bangud nga maka alarma eon suno kana ro sitwasyun, gin engganyo nana ro tanan nga engkaso nga mag abot ro bulto it mga bakuna hay magpaturok eon ro tanan agud nga makaangkon it nagakaigo nga proteksyon kontra sa virus ag matapos eon ro pandemya .
Nasayuran nga ro nabas hay may kabilugan nga 255 nga kaso kun sa siin 109 ro actives cases ag nagapabilin nga 4 ro namatay.
