KALIBO, Aklan— Naging matawhay ro pagselebrar it Bag-ong dag-on sa isla it Boracay sa pihak it pagbuhos it mga turista.
Suno sa pamunuan it Caticlan jetty port, sa makaron hay indi pa sanda makapaguwa it ensaktong numero it mga bisitang nagbakasyon sa isla makaron nga dag-on kapin eon makaron nga holiday season.
Apang, sigurado suno kana nga napas-eawan sanda nga maabot ro target kunta nga tourist arrival nga daywang milyon bangud sa an-om nga bueang pagpasarado para sa paglimpro ag rehabilitasyon.
Samtang, ginhugtan it Malay PNP-Boracay sub-station ag Boracay Police Task Force ro andang pagbantay sa front beach ag mga lugar nga maabong tawo.
Apisar nga uwa ro ginabantayang bonggang fireworks display kada dag-on sa tunga it dagat, napuno gihapon it mga local ag foreign tourists ro isla halin sa Station 1 hasta Station 3.
Nauna eon kara nga ginpadumdom ni DILG Secretary Eduardo Año sa Boracay Inter-Agency Task Force nga hugot nga ipatuman ro mandato ni Pangueong Rodrigo Duterte nga uwa it fireworks display sa isla sa pagsug-aeaw sa Bag-ong dag-on.
Raya hay sa pihak it gindihong resolusyon it LGU-Malay nga pasugtan ni Duterte ro andang hinyo.
Nasayuran nga generally peaceful man ro selebrasyon it Paskwa sa isla.
