Kalibo Aklan ——–Nag-abot eun sa 12,628 ro kabilugan nga numero it mga turistang nagabisita sa Isla it Boracay umpisa Hunyo 1 hasta 17, sa presenteng dag-on.
Samtang naga-average man it 69 ka mga flights kada adlaw ro nagahugpa sa Caticlan Airport.
Suno kay Municipal Tourism Officer Felix Delos Santos it Malay Municipal Tourim Office nga kaabuan sa mga turistang nagabisita makarun sa Isla hay maghalin sa NCR plus.
Samtang, naga-abot man sa masobra 600 hasta 1000 ka mga turista ro nailista kada adlaw.
Nagapabilin man nga ro kinahangean agud nga makasueod sa Boracay hay ro nagatibong resulta it RT-PCR test, pamatood it booking sa accredited hotel it Department of Tourism (DOT) valid I.D, QR code ag S- Pass.
Samtang sa pihak nga parte, ginpahayag man ni Delos Santos nga sa makarun hay nagahueat pa sanda it igapaguwa nga Executive Order ni Malay Mayor Frolibar Bautista may kaangtanan sa igapatuman nga pagsinueondan sa Isla sa maabot nga kapiyestahan ni San Juan de Bautista sa maabot nga Hunyo 24.
Ro nasambitan nga EO hay ginaeauman man nga maipaguwa ano man nga oras makarun nga adlaw.
