KALIBO, Aklan— Ginmultahan it Boracay Inter Agency Task Force ag pulisya ro nag-viral nga turistang babaye sa social media matapos nga mausoy raya it mga otoridad kaibahan ro anang nobyo sa ginadayunan nga hotel sa Station 1 sa isla it Boracay.
Ginkumpirma ni Boracay Inter-Agency Rehabilitation Management Group (BIARMG) general manager Natividad Berdandino nga ro nasambit nga dumueuong hay sangka Taiwanese nga ginmultahan it P2,500 bangud sa pag-eabag sa Municipal Ordinance No. 203 series of 2003 kasunod it pagsuksok kara it bikini string, kun sa siin, haeos hubeas eon imaw bangud sa maisot nga tela nga nakatabon sa mga maselan nga parte it anang eawas samtang nga nagatikang ag naga-selfie sa front beach sa Station 1.
Nasayuran nga daywang beses imaw nga nagpa-litrato suksok ro bikini string. Ko Miyerkules hay suksok kara ro beige nga swimwear sa backbeach ag kahapon hay ro puea sa Station
Sa presinto kaibahan ro anang nobyo, ginpaathag it babaye nga para kana hay owa man imaw it ginhimo nga maeain bangud nga sangka “form of self expression” eamang ro anang gin-obra.
Apang ginpaathag it mga otoridad nga makabig nga indecency ukon public scandal ro anang ginhimo bangud sa kultura it mga Pinoy nga pagiging konserbatibo.
Nasayuran nga gin-pyestahan imaw it mga residente ag iba pang mga bakasyunista sa isla.
Nakataeana makaron nga adlaw mnga magabalik sa andang nasyon ro nasambit nga dumueuong matapos ro pilang adlaw ag kontrobersiyal nga bakasyon sa Boracay.
Nasayuran nga bukon eamang it raya ro unang beses nga may mga foreigner nga naghimo it eskandalo sa sikat nga isla.
