KALIBO, Aklan—Haeos balik eon sa normal ro sitwasyon sa nasyon it Turkey.
Suno kay Bombo International Correspondent Cj Señeres Sta. Maria, sangka seaman sa bahin it Izmir, Turkey nga owa eon nagasuksok it face mask ro mga pumueoyo idto.
Mabatyagan man suno kana ro haeuga nga quarantine restriction sa lugar.
Nagdungka sigon ro andang container ship sa nasambit nga nasyon ko adlaw it Lunes ag nakataeana sanda nga magpanaw makaron nga adlaw.
Sa pihak kara, nakalista ro Turkey it kabilugan nga 6,498,054 kaso it Coronavirus Disease 2019 ukon COVID-19 umpisa nga magtuhaw ro pandemya.
Sa nasambit nga numero, kapin sa 5,930,665 eon ro nagmayad matapos ro pagbueong ag quarantine procedure.
Sa makaron, naga-abot pa sa 509,283 ro nabilin nga aktibong kaso samtang 58,106 ro namatay matapos dapuan it COVID-19 infection.
