Ginklaro makaron it Department of Social Welfare and Development ukon DWSD nga tatlong ka banwa pa eamang ro nataw-an it Unconditional Cash Transfer ukon UCT cash card.
Suno kay Beverly Salazar, provincial link it 4p’s nga ro tatlong ka munisipalidad hay ginakaeakipan it Madalag Banga ag Malinao kon siin gin-umpisahan ro pagpanupod ko Setyembre 24 ag magabuhay hasta sa Disyembre 3.
Pagahimuon ro validation kada adlaw it Sabado ag pagasundan it pagrelease it cash card it mga senior citizen.
Ro pagklaro it DSWD hay kasuno sa reklamo ni Linda Dela Cruz it Brgy. Fulgencio Sur, Balete kon siin sa kaabuon sigon it mga senior citizen sa andang barangay hay imaw eamang ro uwa sa listahan nga makabaton it cash card.
Ginpahayag dugang ni Salazar nga tanan nga mga lolo ag lola hay nakaeakip sa UCT apang kon uwa ro andang pangaean sa listahan hay posible nga nabutang raya sa ibang banwa ukon barangay bangud posible sigon raya nga matabo.
Apang, uwa pa nareleasan ro banwa it Balete rason nga inde pa makumpirma kon uwa gidman sa listahan ro pangaean ni Dela Cruz.
Nasayuran nga ro makabaton it UCT hay ro mga kwalipikado ag active senior citizen pensioner maghalin ko dag-on 2018.
