SPORTS News — Ginkumpirma it athletics federation it Uganda nga napatay ro andang Olympian marathon runner ko nagtaliwan nga mga inadlaw matapos ginsunog it anang nobyo.
Ro iktima hay si Rebecca Cheptegei, 33, naga-istar sa Kenya, ag nagpang-44 sa women’s marathon nga anang ginpasakupan sa Paris Summer Games ko nagtaliwan eamang nga buean
“We are deeply saddened to announce the passing of our athlete, Rebecca Cheptegei early this morning who tragically fell victim to domestic violence.” “As a federation, we condemn such acts and call for justice. May her soul rest In Peace.” suno sa post it Uganda Athletics Federation sa social media.
Ko Domingo kat natabo ro insidente sa baeay it biktima sa western Trans Nzoia County.
Ginpahayag nga nag-agto sa andang baeay ro anang boyfriend nga si Dickson Ndiema nga may daea nga gasolina. Base sa report it pulis, may nabatian pa nga singgitan ro mga kaeapit-baeay bangud sa away sa eugta antes ginbubuan it suspek it gasolina ro eawas it atleta ag ginsug-an.
Bangud sa pagdaba-daba it anang eawas, haeos 80% gid ro nasunog it anang eawas ag ko kag Miyerkules nga adlaw, ginkumpirma it ospital nga nag-angkon ro biktima it multi-organ failure nga rason nga ginbawian raya it anang hueam nga kinabuhi.
Ro suspek man hay nakaangkon it sunog sa 30% it anang eawas ag padayon pa nga ginabueong sa ospital sa syudad it Eldoret.
Nagpasalig man ro Kenya nga paga-imbestigahan ro insidente.
Ika-tatlo eon si Cheptegei nga elite female athlete nga ginpatay sa Kenya sa sueod eamang it tatlong dag-on.
Ko 2021, ginpatay man ro sangka 25-anyos nga Olympic runner sa anang baeay kun sa siin gintadtad raya it buno sa anang liog.
Ginpasakaan it kasong murder ro anang asawa.
Pilang buean ro nagtaliwan, sangka 28-anyos nga Kenyan athlete man ro nasapwan nga patay sa anang baeay, kun sa siin ginapatihan nga gin-eu-ok, ag ro anang boyfriend ro main suspect.
Base sa latest figures sa Kenya National Bureau of Statistics, nabaehag nga ko January 2023, 34 percent it mga babaye sa nasambit nga nasyon ro naka-eksperyensya it physical violence halin sa edad nga 15-anyos.
