Nagahueat it shipment halin sa Busan, South Korea paadto sa Pilipinas ro ulihing batch it automated counting machines (ACMs).
Ginpahayag it Commission on Elections (Comelec) nga ro mga Automated Counting Machine hay idto eon sa Busan New Port Complex kon sa siin nasaksihan it pila sa mga opisyal kara ro pagtipon, pagbuyot, ag daeayon nga containerization it ulihing batch.
Ro nabilin nga batch it Automated Counting Machine kits hay forklifted ag ginbutang sa daywang secure nga intermediate shipping container nga may kabilugang masobra sa 1,000 nga kahon.
Raya hay ginakaeakipan it hard case, mga power cord ag adapter ro kada kit.
Punterya ro shipment it daywang cargo container makaron nga Nobyembre 4 ag ro delivery sa Comelec warehouse sa Biñan, Laguna hay ginaeauman sa masunod nga inadlaw.
Madumduman nga ko Oktubre 30, ginpahayag it Comelec nga ro Miru Systems Joint Venture, ro service provider it P17-bilyon pesos nga proyekto hay natapos eon ro produksyon it 110,620 machine ag peripheral sa Miru Plant sa nasambit nga nasyon.
