KALIBO, Aklan — Pauli eon makaron nga Lunes it gabi-e, Enero 27 ro nabilin nga turistang Chinese halin Wuhan, China nga presenteng nakabakasyon sa isla it Boracay.
Suno kay Civil Aviation Authority of the Philippines (CAAP)-Aklan manager Engr. Eusebio Monserate Jr., ko Biyernes it gabi-e nakabalik eon sa Wuhan ro 150 Chinese tourists samtang ko Sabado it gabi-e hay nagbyahe man ro 179 nga iba pa.
Pila sa mga raya hay kaparte it grupong nakabiyahe pa ko Huwebes it agahon antes ginpatuman ro lockdown it Chinese authorities sa nasambitang siyudad nga imaw ro ginhalinan it outbreak it novel corona virus.
Ginklaro pa ni Engr. Monserate nga bukon raya it mandatory repatriation kundi kinahang-ean sandang paulion base sa schedule it andang package tours ag inde eon pagpasugtan nga makaangkon pa it extension ro andang bakasyon.
Nasayuran nga pilang oras antes ro ginpatuman nga lockdown sa nasambitang syudad, kapin sa 135 pang pasahero sakay it charter flight it Royal Air ro naghugpa sa Kalibo International Airport.
Tanan nga crew members nga puro mga Pinoy hay uwa eon ginpasugtan nga makapanaog it eroplano pag-abot sa Wuhan.
Sa pihak nga parte, ginpasiguro ni Engr. Monserate nga inde makaapekto sa operasyon it paeoparan it Kalibo ro pagsuspinde sa flight halin Wuhan City.
Ro Kalibo International Airport hay may 30 international flights kada adlaw nga kaeabanan hay naghalin sa Wuhan, Shendou ag Nanjing sa China.
May direct flight man raya sa Korea ag Taiwan.
