KALIBO, Aklan—Dapat kunta naging sentro it ika an-om ag katapusan nga State of the nation address ukon SONA ni Pangueong Rodrigo Duterte ro mga major issues kara ag ro mga ginpromisa kat imaw hay magapadaeagan pa eamang sa pagka-Presidente.
Raya ro naging reaksiyon ni Aklan 1st District Sangguniang Panlalawigan Member Atty. Harry Sucgang sa katapusan nga SONA ni Pangueong Duterte.
Suno kana nga dapat nataw-an it klaro nga punto it Pangueo ro mga ginapabugae kara nga hinimuan kapareho it pagsugpo sa corruption, drugs ag criminality.
Sa pihak kara, ginpahayag ni Sucgang nga 50-50 eamang ro score ni Duterte kung imaw ro magpanan-aw bangud maabo man kara ro ginpromisa nga owa man nataw-an it aksiyon samtang nagahieapit eun lang nga matapos ro anang termino.
