KALIBO, Aklan—Uman nga nagpanawagan ro sektor it transportasyon sa provincial government nga padasigan eon ro pag obra it Local Transport Public Route Plan ukon LTPRP.
Suno kay Edgar Igcazensa, manager it Malinao Lezo Transport Cooperative nga kaabuan sa andang mga nagabiyahe nga public utility jeepney hay nag-expired eon ro probationary authority ko Abril 30 samtang ro mga may legal franchise holder hay nakataeana man nga maga expire makaron nga 2022.
Sa 42 sigon nanda nga unit hay pito eon lang ro may franchise nga owa pa napaso.
Apang nabudlayan sanda sa pag ayos sa mga dokumento bangud sa kawad-an it LTPRP.
Haeos tanan nga banwa suno kana hay nakasumite eon it LTPRP sa provincial government, apang sa andang follow up sa LTFRB hay owa pa may naipasa idtu ro Aklan.
Nagakabaeaka sigon sanda bangud nga raya hay maeawig nga proseso.
Nasayuran nga ro LTPRP hay sangka dokumento nga kinahangean para sa jeepney modernization.
Kinahangean sigon raya it tanan nga mga transport cooperative agud nga ma isyuhan it franchise kamana man tax exemption para sa andang pag-loan sa bangko sa pagbakae it modern jeepney.
