KALIBO, Aklan—Uman nga nakalista it daywang ka mga panibag-ong kaso it coronavirus disease 2019 ukon COVID-19 sa probinsya it Aklan.
Raya hay base sa ginpagguwa nga official statement it Provincial Health Office ukon PHO-Aklan kung sa siin daywa sa 33 nga mga resulta it ginpatigayon nga RT-PCR test sa mga nakaangkon it contact sa COVID-19 patients hay nagpositibo sa nasambitan nga sakit.
Ginpahayag ni Dr. Cornelio Cuatchon Jr it PHO-Aklan nga ro nailistang kaso hay ginakaeakipan ni case no. 135, 34-anyos nga eaeaki nga residente it banwang Banga ag sangka local case.
Ginsundan man raya ni Case No. 136, 33-anyos nga babaye, tumandok it banwang Malinao ag sangka Returning Overseas Filipino (ROF).
Samtang, tatlo man ro nailistang recoveries nga tanan hay maghalin sa banwa it Kalibo.
May kabilugang 136 nga total cases eun ro nailista sa probinsya kung sa siin kapin sa 17 ro aktibong kaso ag presenteng ginaeapatan it nagakaigo nga medikasyon.
