KALIBO, Aklan—Nagpaandam si Atty Axel Gonzales, sangka political observer sa Aklan nga pwedeng gamiton ro mga barangay political machinery sa 2028 national elections kasunod it pagpaeawig sa termino it mga presenteng barangay ag sangguniang kabataan officials.
Suno kana nga ro nasambit nga tikang hay makabig nga sangka klase it political expediency.
Ro sunud-sunod nga postponement it BSKE suno kana hay sangka pag-eabag sa laye nga pwedeng magtuga it mabahoe nga oposisyon halin sa publiko ag maging rason it maeapnagon nga paghueag sa ulihi.
Dugang pa ni Atty Gonzales nga ro gina obra makaron ni President Marcos Jr., hay medyu anang gin-pattern sa mga tikang nga gin-obra it anang amang si dating Pangueong Ferdinand Marcos Sr., sa Martial Law era rason nga nagbuhay raya sa anang pwesto it maeawig nga tiempo.
Apang sa makaron hay owa eon suno kana kahadlok ro mga tawo nga magpahayag it andang opinion eabi eon sa social media kamana man nga mataas eon ro awareness it publiko sa mga isyu sa gobyerno.
Mabahoe man sigon ro posibilidad nga ro pagpaiway eon man sa BSKE hay pagakwestiyunon sa Supreme Court kapareho it ginhimo dati ni Atty. Romulo Macalintal.
