Pagadebatehan sa igapatigayon nga high-level emergency special session it United Nations General Assembly makaron nga bisperas it unang anibersaryo it Russian invasion sa Ukraine ro sangka resolution para pagabotohan ro apela para sa ceasefire ag katawhayan para sa soberanya it Ukraine.
Madumduman nga nauna eon nga naghinyu ro Ukraine sa European Union nga magbaeay it resolution sa pakikipag-konsulta sa member states it UN para makatipon it mapag-on nga suporta maghalin sa international community para sa katawhayan sa Ukraine.
Sa naging diskurso ni UN Secretary General Antonio Guterres, gintawag kara ro anibersaryo it pag-atake it Russia sa Ukraine bilang sangka grim milestone sa pumueuyo it Ukraine ag para sa international community.
Suno man kay US ambassador to the United Nations Linda Thomas-Greenfield, gin-engganyo it nasambit nga resolution ro 193-member states nga suportahan ro diplomasiya, komprehensibo ag pang-mabuhayan nga katawhayan para sa Ukraine.
Ro pagboto sigon sa resolution hay magiging kaparte it kasaysayan ag kara makit-an kung ano ro posisyon it tanan nga isyu pangkatawhayan para sa Ukraine.
Samtang, may kapin sa 60 mga nasyon ro nag-sponsor it resolution kung siin gin-engganyo ro Russia nga insigida ag eubusan eon nga umatras nga owa it ginapangayo nga kabaylo maghalin sa teritoryo it Ukraine.
