KALIBO, Aklan–Makabig nga sangka importanteng hitabo sa kalibutan ro igapatigayun nga United Nations (UN) General Assembly sa New York, USA.
Sa raya nga kahigayunan maga-kililita ro mga world leaders ag magapatigayun it diskurso.
Suno kay Bombo International Correspondent Greg Aguilar nga ginaeauman eon nanda nga maabu nga mga bilateral meetings ro matabo sa tunga it kada lider it mga nasyon.
May kaangtanan kara, nagahueat pa sigon sanda sa igapagguwa nga update it Philippine Consulate angot sa mga aktibidad ni Pangueong Ferdinand “Bongbong” Marcos Jr.
Nagaeaum sigon sanda nga makikipag-kita ro pangueo sa Filipino Community sa New York City kapareho it gina-ubra it mga dating presidente nga nagabisita sa Amerika.
Nagapati man si Aguilar nga uman nga magapanumbalik ro manami nga relasyon sa tunga it Amerika ag Pilipinas.
Sa pihak nga parte, ginpaathag ni Aguilar nga sangka manami sigon nga oportunidad ro UN General Assembly para ma-istoryahan it mga nasyon ro problema angot sa Climate Change.
Nasayuran nga sambilog sa gustong matutukan ni US President Joe Biden ro pagsukoe sa climate change kaeakip ro pagkatunaw it ice berg sa North Pole.
