KALIBO, Aklan–Gin-alarma it UN ro seguridad it pasilidad it Zaporizhzhia nuclear power plant matapos nga raya hay gina-alegar nga gin-atake it Russia.
Suno kay Bombo International Corrrespondent Alma Arcilla it Moscow, Russia nga nagakabaeaka sa makaron ro UN leaders bangud sa danyos nga gin-aywan it nasambit nga pag-atake ag ro posibilidad nga eubusang pagsabog it power plant.
Nagresulta ro nasambit nga pag-atake it kamatayon it sambilog katawo, pito ro ninahan kaeakip eon ro sangka 13-anyos nga babaye.
Naka-angkon it 10 nga tama sa opisina ag istasyon it bumbero sa pinakamabahoe nga planta it kuryente sa Europa.
Suno man sa UN Secretary General António Guterres nga posibleng magaresulta raya it grabe nga disgrasya ag makabig nga katapusan it Europa.
Nasayuran nga ro Zaporizhzhia nuclear power plant hay ro pinakamabahoe nga nuclear power plant sa Europe ag kaeakip sa 10 pinakamabahoe sa kalibutan.
Sa makaron padayon sa gihapon ro naga-eontad nga giyera sa tunga it daywang nasyon.
