Uman nga nag-apela si United Nations Secretary-General Antonio Guterres may kaangtanan sa pagpapundo eon it giyera sa Ukraine kasunod it ika-100 diyas umpisa tag ginsalakay it Russia ro rehiyon.
Ginpahayag ni Guterres nga kinhangeang taw-an it nagakaigo nga daean ro humanitarian access sa mga nagakinahangean it bulig,kaibahan eon ro maayos nga evacuation sa mga na-trap nga mga sibilyan ag pagrespeto sa kinamatarong it sangka indibidwal.
Mataeopangdan nga sa pagtaliwan it kapin sa ap-at nga buean hay linibo eon katawo ro mga namatay at milyun milyon man ro nagbakwit.
Ro nasambit nga giyera suno pa sa lider it UN hay naghalit it global crisis kapin sa patag it pagkaon, enerhiya ag pagkaduea it pangitan-an it mga apektadong nasyon ag ekonomiya.
Kadungan kara, ginsiguro man ni Guterres nga haum ro United Nations sa programa kara kapin kung raya ro magaserbi nga tikang ukon tulay para sa negosasyon ag dayalogo.
Samtang, nagapati man ro UK Ministry of Defence nga maeapit lang nga masakop it eubos it Russia ro bilog nga Luhansk region sa Eastern Ukraine ag posibleng makontrol eon sa sueod it daywang dominggo, raya hay matapos nga mapaseawan ro Russian forces nga maagaw ro siyudad it Kyiv.
