Naglunsar ro United Nations it donation drive sa handom nga makatipon it kabilugang $275 million ukon mas masobra pa bilang bulig sa mga biktima it magnitude 7.7 nga linog sa Myanmar.
Suno sa UN, ro matipon nga pondo hay magamit para mabuligan ro mga pumueoyo nga eubus nga naapektuhan sa maeapnagong pag-uyog kon sa siin maabo kanda hay nakaeksperyensya it nagkaeain-eain nga sakit, kagutuman, ag uwa it maistaran nga baeay.
Nauna eon nga ginatantya it UN nga kinahang-ean makatipon it hasta sa $1.1 billion nga pondo, base sa inisyal nga humanitarian aid plan para sa ginatantyang 5.5 million katawo nga naapektuhan.
Apang, hasta sa limang porsyento pa eamang sigon kara ro nataw-an it pondo.
Bangud sa kapin pang nagainabo ro kinahang-ean it mga biktima it pag-uyog, ginpahayag it UN nga kinahang-ean pa it dugang nga resources bilang sabat.
Magaserbeng pokus sa bag-ong inisyatiba ro 1.1 million ‘vulnerable people’ sa Myanmar nga kaeabanan hay mga onga ag mga babaye nga nagapangatubang sigon sa gender-based violence, food insecurity ag kakueangan it nagakaigong access para sa reproductive health.
