Suno kay president-elect Ferdinand Marcos Jr., indi pagakunsintihon it anang administrasyon ro anumang korapsiyon sa gobyerno.
Partikular nana nga gintumod ro Bureau of Customs ag Bureau of Internal Revenue.
Indi sigon nana pagpasugtan ro korapsyon ag paga-eagson ro mga opisyal nga maeakot.
Mayad ag samtang temprano pa hay nagpaandam eon si Marcos sa mga korap.
Raya ro ginahandum it publiko, ro matapna ro mga korap sa gobyerno.
Sambilog pa sa mga taeatapan it gobyerno nga dapat tutukan ni Marcos hay ro Bureau of Immigration.
Pugad it mga sueok nga ‘‘buaya’’ ro BI.
Pinakamaabung buaya sa Immigration sa Ninoy Aquino International Airport (NAIA).
Kaabuan sa mga BI officials sa NAIA hay gina-kwartahan ro mga dumueuong partikular ro mga Chinese ag South Koreans nga gustong makasueod sa nasyon.
Maskin nga makadueuda ro dokumento it mga dumueuong, ginapasueod kabaylo it mabahoe nga kantidad
Indi makalipatan ro ‘‘pastillas scam’’ sa NAIA nga ginpa-uso it mga corrupt BI officials idtu.
Sa nabulgar nga ‘‘pastillas’’ pinaagi kay Sen. Risa Hontiveros, nga gin-imbestigahan sa Senado, P40 bilyon pesos ro naboesa it mga korap sa Immigration bangud sa visa-upon-arrival (VUA) policy nga ginapatuman sa mga dumueuong nga nagasueod sa nasyon umpisa 2017.
May mga corrupt nga BI officals nga ginsibak si President Duterte apang owa masyadong umepekto bangud nga padayun sa gihapon ro anomaliya sa nasambit nga taeatapan.
Makaron nga nagpaandam eon si Marcos sa mga corrupt sa gobyerno, dapat nana nga butangan it mga mayad nga pinuno ro BI.
Pili-on nana ro mga tawong may ikasarang nga silhigon ro mga korap sa taeatapan nga pagadumaeahan.
Kon indi makapili si Marcos it tamang pinuno sa BI, forever eon nga magiging pugad it buaya ro nasambit nga taeatapan.
