Kalibo Aklan ————-Naging madinaeag-on ro unang adlaw it remote enrollment it Department of Education (DepEd- Aklan) para sa paeaabuton nga pagbukas it klase.
Suno kay Melgie Villareal, Planning Officer it DepEd-Aklan nga pamaagi eamang sa online ukon sa text message ag tawag ro enrollment makarun bangud sa pagdahan sa gihapon sa pagtaeapnan it coronavirus disease (COVID-19).
Madumduman nga kahapon nga adlaw, Agosto 16, it gin-umpisahan eun it Department of Education (DepEd) ro enrollment sa bilog nga nasyon.
Sa idaeun it DepEd Order No. 32, magapatigayon eamang it remote enrollment sa mga lugar nga una sa Enhanced Community Quarantine (ECQ) ag Modified Enhanced Community Quarantine (MECQ).
Dikara hay magatawag eamang sa mga eskwelahan ro mga ginikanan apang puwedi man nga ro mga ginikanan mismo ro magtawag sa mga manugturo para i-enrol ro andang unga.
Puwede man nga igasumite eamang it mga ginikanan ro ginasabtang Modified Learner Enrollment and Survey Forms (MLESF) sa mga eskwelahan nga una sa idaeum it General Community Quarantine (GCQ) ag Modified GCQ areas.
Pwedi man nga magtaeana ro mga eskwelahan it drop box enrollment kung siin igahueog it mga ginikanan ro MLESF sa mga drop box ukon booths nga makit-an sa prenti it school gate, barangay hall ag iba pang strategic locations.
Ro enrollment hay pagadumaeahan it mga manugturo ag non-teaching personnel nga bakunado eun kontra COVID-19.
