KALIBO, Aklan—Naging madinaeag-on ro unang daywang adlaw it National Vaccination days kontra COVID-19 sa bilog nga probinsiya it Aklan.
Suno kay J-Lorenz Dionisio,Nurse II it Provincial Health Office ag nagadumaea sa ginapatigayon nga vaccination roll-out, ko Nobyembre 29 ag 30 hay masorbra sa 18,000 ro nabakunahan ukon tig 8,000 kada adlaw sa bilog nga aklan.
Ro tatlong adlaw nga national vaccination drive hay magatapos makaron nga adlaw, Disyembre 1.
Apang, maga-dere-deretso sigon ro andang bayanihan bakunahan hasta sa biyernes sa pag-eaum nga maangkon ro ginahandum nga herd immunity sa probinsiya sa mas madali nga tiempo.
Bangud sa kaabuon it mga gustong magpabakuna eabi eon sa pediatric population, mag-eowas sa ABL sports and cultural complex hay ginagamit man nanda makaron bilang dugang nga vaccination site ro aklan catholic college ukon ACC gymnasium.
Ro ABL ro andang gintaeana para sa 15 hasta 17 anyos nga vaccinee gamit ro Pfizer ag moderna ag ro ACC gym ro para sa walk-in nga adult population ukon 18 anyos pataas gamit ro sputnik V ukon gamaleya ag iba pang brand it vaccine.
Samtang, ginpaabot man ni Dionisio nga haeos 70% eon it target population ro nabakunahan it unang dose sa aklan, samtang haeos 50% ro ikaywang dose.
Sa pihak nga parte, gin-umpisahan eon man sigon nanda ro pagtau it booster shot kun sa siin andang gin una ro mga frontline healthcare workers ag mga senior citizens, apang raya hay magadepende sa availability it andang bakuna.
