KALIBO, Aklan—Makabig nga generally successful it Department of Education (DepEd)-Aklan ro unang dominggo it pagbukas it klase sa tanan nga mga pampublikong ag pilang pribadong eskwelahan sa probinsya para sa School Year 2020-2021.
Suno kay Dr. Miguel Mac Aposin, Schools Division Superintendent it DepEd-Aklan, nga nagapadayun pa ro andang monitoring agud nga masiguro nga maayos ro implementasyon it bag-ong sistema it pagtinueor-an sa pihak it ginapangatubang nga Coronavirus Disease 2019 ukon COVID-19 pandemic.
Suno kana, ro distribusyon it mga modules hay ginatugyan eon lang nanda sa mga school heads kung sa siin, ro mga raya ro maga-schedule.
Gindugang pa kara nga padayun pa ro andang pagtipon it feedbacks ag observation sa presenteng school year, kun sa siin indi sigon malikawan nga makaangkon it aberya.
Ginaeauman eon sigon it DepEd ro mga problema ag isyu nga magatuhaw sa pagpatuman it blended ag distance learning.
Apang, ginpasiguro man kara nga insigidang paga-aksyonan it taeatapan ro anumang problema agud eubos nga maintindihan it mga learners ro andang leksyon.
Samtang, ginpasaeamatan man ni Dr. Aposin ro mga manugturo nga nagpueaw agud nga ma-imprinta ag mapahaum ro tanan nga mga modules.
