Ginkumpirma it Department of Health (DOH) nga na-detect eon sa Pilipinas ro unang kaso it Omicron subvariant nga BA.2.12.
Ginpahayag it DOH nga raya hay sangka 52-anyos nga dumueoong nga babaye halin sa Finland nga nag-abot ko Abril 2.
Suno sa ahensiya, bukon it required ro nasambit nga biyahero nga magpaidaeom sa facility quarantine bangud nga imaw hay fully vaccinated eon ag nag-abot sa nasyon nga asymptomatic.
Nasayuran nga nag-adto ro pasyente sa sangka university sa Quezon City antes nga nag-adto sa syudad it Baguio.
Suno sa DOH, nakaeksperyensya it mild symptoms kaparehas it pagpanakit it ueo ag sore throat ro nasambit nga Omicron case siyam nga adlaw matapos ro anang arrival sa nasyon ag nagguwa nga positibo sa COVID-19 sa masunod nga inadlaw.
Nagbalik raya sa Finland ko Abril 21 matapos nga makarekober sa sakit.
Sa pihak kara, gin-isnister it DOH nga uwa it ebidensiya sa makaron nga ro sublineages hay magtuga it mas severe disease.
