KALIBO, Aklan–Makabig nga generally peaceful and orderly ro unang sang dominggo it pagbukas it klase para sa School Year 2022-2023 sa bilog nga banwa it Kalibo.
Suno kay PLt. Aubrey Ayon, Deputy Chief for Operations it Kalibo Municipal Police Station nga hugut nanda nga gintutukan ro Balik Eskwela Program para masiguro ro maayos nga pagbalik sa eskwelahan it mga estudyante, ginikanan ag manugturo.
Sa kamatuoran suno kana, kapin sa siyam ka mga eskwelahan ro andang gintutukan partikular ro mga maabu it populasyon ag maeapit sa national highway para mabantayan ro daeagan it trapiko.
Ginpasiguro man kara nga magapadayun ro andang deployment ag ro paglibot it mobile patrol para sa sigidas nga monitoring ag pagpasiguro nga masunod ro health protocols.
Ginpaathag man ni Ayon nga owa sanda it nabaton nga report nga nakaangkon it problema ro mga estudyante kadungan it pagbukas it klase.
