KALIBO, Aklan—Kabilugan nga naging matawhay ro pagdumdom it Undas 2022.
Raya hay matapos nga uwa it nailista nga untoward incident sa daywang adlaw nga nakaangdan nga selebrasyon.
Mag-eowas kara, ginpahayag ni P/Cpl. Leonelyn Artes, tagapaghambae it Aklan Police Provincial Office nga uwa man sanda it nakumpiska nga mga hinangiban ukon mga mataeom nga bagay kamana man mga gamit nga pwedeng magamit sa illegal nga sugae.
Posible suno sa pulisya nga resulta raya it maid-id nga information dissimination pinaagi sa mga media partners kon siin naging aware eon ro mga pumueoyo sa mga regulasyon nga ginpatuman it pamunuan it kada sementeryo sa bilog nga probinsya it Aklan.
Ginpahayag pa ni Artes nga kueang kueang sa 300 ka mga PNP personnel ro gindeploy sa nagkaeain-eain nga sementeryo sa probinsya kon siin naging matawhay ag maayos ro andang monitoring.
Nataeopangdan sigon it mga PNP personnel nga nakataeana sa kada sementeryo nga bukon it dueogsuan ro mga tawo kaparehas ko mga nagtaliwan nga dinag-on kon siin nagaginutok eang ro mga nagabisita sa andang mga pinalanggang himata nga nagtaealiwan.
Posible suno kana nga resulta raya it paghaeong it mga pumueoyo bangud nga sa tunga gihapon kita it pandemya kamana man ro iba hay masako pa it pagpanghimos sa tagsa nanda ka panimaeay matapos ro halit nga gin-aywanan it Bagyong Paeng.
