NATIONAL News — Ginbaeabagan it Bureau of Customs (BOC) ro karga it barko nga MV Bangpakaew matapos nga nagdiskarga raya sa Subic it sinako nga refined sugar halin sa Thailand.
Karga it barko ro 7,000 metric tons ukon 140,000 nga bag it asukar.
Sa report nga nabaton ni Executive Secretary Vic Rodriguez naghalin kay Customs Commissioner Yogi Filemon Ruiz, “recycled” ro import documents nga ginpakita it barko.
Gina-imbestigaran eon ro insidente it BOC kasunod it ginpabaskog nga kampanya it gobyerno kontra sa iligal nga pag-import it agricultural products kapareho it asukar.
Nagapadayon man makaron ro inspection sa mga warehouses it asukar.
Ko nagtaliwan nga mga inadlaw sa magkaseparadong inspeksyon it Customs Intelligence and Investigation Service (CIIS) and Enforcement and Security Service (ESS)-Quick Reaction Team sa Bulacan, masobra sa 70, 000 ka mga sako it asukar ro nakita it otoridad.
Sa Pampanga, sambilog pang warehouse ro ginadudahan nga naga-hoard it asukar nga halin sa Thailand.
