Paga-umpisahan eon sa Lunes it prosecution ro pagtalakay sa Article II ukon unexplained wealth sa impeachment trial ni Vice President Sara Duterte, matapos makumpleto ro presentasyon it mga ebidensiya angot sa saea sigon nga paggamit it confidential funds.
Suno kay prosecution legal spokesperson Atty. Benjamin Tolosa, paga-usisaon ro mga bank account ni Duterte ag mga rekord halin sa BIR ag AMLC.
Ginhambae ni Tolosa nga indi eon nanda ipresenta ro dugang nga mga testigo bangud bastante eon sigon ro mga nakolekta nga ebidensiya.
Kaibahan kara ro testimonya it mga bank manager, Special Disbursing Officers, COA auditors ag PSA officials angot sa cash withdrawals, gina-alegar nga pag-eabag sa accounting rules, kakueangan it mga resibo ag mga pangaean sa acknowledgment receipts nga uwa it katugmang PSA records.
Suno pa sa prosecution, nakuhit eon nanda ro andang evidentiary targets para suportahan ro alegasyon it saea nga paggamit it confidential funds.
Apang, ginhambae ni Tolosa nga una sa alima it mga senator-judges ro pag-desider kun bastante ro mga ebidensiya para sa conviction, samtang magapabilin nga bukas ro Article I para sa posibleng pagpatawag it dugang nga mga saksi kun kinahangean.
