Ginkumpirma ni Senador Jinggoy Estrada nga ro anang unga ag gumankon hay ginkastigo it tatlong eaeaki nga lokal nga mga residente it Boracay aga-aga kahapon, ika-24 it Mayo.
Base sa salaysay it mga biktima, pauli eon halin sa sangka bar ro daywa kat atakehon sanda it mga suspek halin sa likod.
Istorya ni Estrada, hinambae sigon it sambato sa mga sumalakay sa anang gumankon nga “masyado kang maangas”. Suno pa sa senador, uwa it natabong komprontasyon sa tunga it mga biktima ag suspek sa sueod it bar, ag makumpirma raya sa CCTV footage nga andang nakalap halin sa lugar it insidente.
Nag-angkon it bayo sa ueo ro unga ni Estrada ag nabali ro kuko sa siki matapos imaw nga pauman-uman nga sipaon ag pagkatapos hay bumagsak samtang nag-angkon man it lastro sa ilong ro anang gumankon nga presente eon nga nagapamayad sa sangka ospital.
Samtang, suno sa Senador, insigida imaw nga umadto sa Boracay kahapon para magpasaka it kaso kontra sa mga imbolbado nga indibidwal.
